QU: Indymedia, 06.03.2004

Im folgenden eine Abfschrift des ausgestrahlten Beitrages von Radio Freiburg. Inzwischen soll auch ein Interview mit dem Stützpunktleiter der PNOS André Gauch ausgestrahlt worden sein.

Radio Friboug, 23.02.04 Fokus Mittag: PNOS

Teaser: d’Brandstifter si unter üs und niemerd reagiert: Fokus Friburg geiht i wenige Minute der rechtsradikale Partei PNOS uf d’Spur, wo gege ds planete Asylberwerberheim ds Plaffeie mobil macht.

A-Modi: Die rechtsradikali „Partei National Orientierter Schweizer“ PNOS het letschti Wuche fremdefeindlichi Flyers verteilt gege ds planete Asylbewerberheim ds Plaffeie. Obwohl sich d’PNOS als Partei verstoht, verschanze sich ihri Mitglieder hinter Poschtfachadresse und Natelnummere.
Und bis hüt hei sich weder d’Parteie, no der Gmeindrat vo Plaffeie no ds Oberamt vom Sensebezirk öffentlich vo der Flugblattaktion distanziert.

Der Bitrag vo der Regula Saner:

Sie schürt Fremdehass und verbreitet ihres Gedankeguet per Flugblatt ds Plaffeie. Aber sie schücht d’Oeffentlichkeit wie der Tüfel ds Weihwasser. Sit letschtem Herbscht het die schwizwit agierendi rechtsradikali Partei PNOS au e Friburger Sektion. Ueber ihri Mitglieder schwigt sie sich allerdings us. Wer versteckt sich hinter em Poschtfach 23 in 1735 Giffers? D’Recherche vo Radio Friburg hei ergä, dass das Poschtfach em André Gauch us Tentlinge ghört. Der 34 jährig Automechaniker isch Stützpunktleiter vo der Sektion Friburg, wie’s im Jargon vo der PNOS heisst. Us Personeschutzgründ und nit öppe us Feigheit welli sich d’Mitgleider vo der PNOS nit oute, erklärt sich d’PNOS schriftlich gegenüber Radio Friburg. D’Partei geiht no witer un verbietet Radio Friburg au Usdrück wie Rechtsradikali und Neonazi. Der andré Gauch git sich harmlos: Er sigi nit rassistisch, aber jedi Rasse a ihre Ort, erklärt der André Gauch. Er sigi au nit gege Usländer, sondern nur gege die Kriminelle. Und das si gmäss em André Gauch eigetlich fasch alli Asylbewerber. Ganz im Stil vo rechtsradikale Gruppierige verunglimpft der Gauch die staatstragende politische Parteie als Versager.

Im Sensebezirk git me sich erstunt über ds Uftauche vo der PNOS. Vereinzelt werde d’Flugblätter zwar verurteilt. Bis hüt fehlt aber jedi öffentlichi Stellignahm vo Behörde. Der Oberamtma Marius Zosso het der Gmeindrat vo Plaffeie ufgforderet, das Thema a der näschschte Gmeindratssitzig ds behandle. Zu witere Schritte gseht er sich allerdings nit veralasst. Ds Giffers, em Poschtfachort vo der PNOS, isch me au nit bsunders beunruhigt. Der syndic vo Giffers, der Ruedi Vonlanthen verurteilt der Inhalt vo de Flugblätter zwar. Er heigi drvo allerdings erscht am Fritig Kenntnis gno, hüt am abe welli me im Gmeindrat drüber diskutiere, erklärt er uf Afrag.

Drüber rede isch ds eine – sich klar distanziere wäri ds andere. Nit ds letscht durch Ignoranz Verharmlosig oder Nitreagiere wird der bruni Teppich für Gruppierige wie der PNOS gleit. Oder wer isch igschrite, wo ame Informationsabe öpper droht het, ds Asylbewerberheim abdsfackle, söttis cho?